អំពីយើង

ធនាគារអភិវឌ្ឍន៍ជនបទ ត្រូវបានបង្កើតឡើងដោយរាជរដ្ឋាភិបាល នៅឆ្នំា១៩៩៨ អនុក្រឹត្យលេខ០១ អនក្រ.បក ចុះថ្ងៃទី២១ ខែមករា ឆ្នាំ១៩៩៨ ដោយមានឈ្មោះថា “ធនាគារអភិវឌ្ឍន៍ជនបទ (ធ.អ.ជ)” ប្រតិបត្តិការជាធនាគារឯកទេសផ្តោតលើវិស័យកសិកម្ម ។ នៅឆ្នាំ ២០១៤ រាជរដ្ឋាភិបាលបានចេញអនុក្រឹត្យលេខ ១៩៩ អនក្រ.បក ចុះថ្ងៃទី១១ ខែមិថុនា ឆ្នាំ ២០១៤ ក្នុងការកែសម្រួលមុខងារភារកិច្ច និងរចនាសម្ព័ន្ធរបស់ធនាគារ ធ.អ.ជ ។ បន្ទាប់មក ធនាគារអភិវឌ្ឍន៍ជនបទ បានប្រែក្លាយពីធនាគារឯកទេស ទៅជាធនាគារពាណិជ្ជដោយបានប្តូរឈ្មោះទៅជា “ធនាគារអភិវឌ្ឍន៍ជនបទ និងកសិកម្ម (ធ.អ.ជ.ក)” តាមអនុក្រឹត្យលេខ ១២៤ អនក្រ.បក ចុះថ្ងៃទី២៧ ខែសីហា ឆ្នាំ២០១៩។

“ធនាគារអភិវឌ្ឍន៍ជនបទ និងកសិកម្ម (ធ.អ.ជ.ក)” ត្រូវបានហៅថា ធនាគារ ARDB មានគោលដៅផ្ដល់សេវាធនាគារពេញលេញប្រកបដោយប្រសិទ្ធភាព និងចីរភាព ដើម្បីគាំទ្រវិស័យកសិកម្ម និងសេដ្ឋកិច្ចជនបទ ដែលរួមចំណែកដល់ការអភិវឌ្ឍសេដ្ឋកិច្ចជាតិ ស្របតាមគោលនយោបាយរបស់រាជរដ្ឋាភិបាល។

ធនាគារ ARDB បានបំពេញតួនាទីជាធនាគារពាណិជ្ជ និងជាធនាគារបម្រើគោលនយោបាយរបស់រាជរដ្ឋាភិបាល ពោលគឺបំពេញកង្វះចន្លោះផ្នែកហិរញ្ញវត្ថុក្នុងគម្រោងអភិវឌ្ឍន៍នានា ដែលគ្រឹះស្ថានធនាគារ និង ហិរញ្ញវត្ថុឯកជនមិនអាចបំពេញបាន ។

ធនាគារ ARDB បាននិងកំពុងពង្រីកវិសាលភាពប្រតិបត្តិការ និងដើមទុនជាបន្តបន្ទាប់ និងមានការសហប្រតិបត្តិការជាមួយដៃគូជាច្រើនក្នុងការផ្តល់ហិរញ្ញប្បទាន និងសេវាធនាគារប្រកបដោយប្រសិទ្ធភាព និងចីរភាពដល់វិស័យកសិកម្ម ។ បច្ចុប្បន្ន ធនាគារ ARDB បានពង្រីកការផ្តល់សេវាហិរញ្ញវត្ថុកាន់តែកៀកអតិថិជន ដោយបានពង្រីកបណ្តាញប្រតិបត្តិការជាសាខានៅខេត្តបាត់ដំបង និងការិយាល័យចល័ត១៤ នៅតាមបណ្តាខេត្ត ដើម្បីផ្តល់សេវាធនាគារជូនប្រជាកសិករ សហគមន៍កសិកម្ម រោងម៉ាស៊ីនកិនស្រូវ សហគ្រាសធុនតូច និងមធ្យម ក្នុងវិស័យកសិកម្ម និងកសិ-ឧស្សាហកម្ម និងភាគីពាក់ព័ន្ធក្នុងខ្សែច្រវ៉ាក់តម្លៃ និងផលិតកម្មកសិកម្ម។

តួនាទី និងភារកិច្ច

ធនាគារ ARDBបានកំនត់តួនាទី និងភារកិច្ចសំខាន់ៗរួមមាន៖

បំពេញតួនាទីជាធនាគារពាណិជ្ជផង និងជាធនាគារគោលនយោបាយផង
ផ្តល់ហិរញ្ញប្បទាន និងសេវាកម្មធនាគារពាក់ព័ន្ធ រួមមាន សេវាឥណទាន សេវាទូទាត់ និងសេវា ទទួលប្រាក់បញ្ញើ ដល់អតិថិជនគោលដៅ ក្នុងខ្សែច្រវាក់ផលិតកម្មកសិកម្ម និងសេដ្ឋកិច្ចជនបទ
ផ្តល់ការគាំទ្រជាគោលនយោបាយលើផ្នែកហិរញ្ញវត្ថុ និងបច្ចេកទេស រួមមាន ការសម្របសសម្រួល និងដោះស្រាយបញ្ហា ក្នុងខ្សែច្រវាក់ផលិតកម្ម វិស័យកសិកម្ម និងសេដ្ឋកិច្ចជនបទ តាមរយៈការស្វែងរកទីផ្សារ ការផ្តល់យោបល់ និងការកសាងសមត្ថភាពជាដើម
លើកកម្ពស់ការប្រើប្រាស់បច្ចេកវិទ្យា និងភាពច្នៃប្រឌិត ដើម្បីពង្រឹងប្រសិទ្ធភាពនៃការផ្តល់សេវាកម្ម និងបង្កើនឧត្តមភាពប្រកួតប្រជែងរបស់អតិថិជនក្នុងទីផ្សារ
សហការ និង/ឬធ្វើសហជីវការជាមួយគឹ្រះសា្ថនហិរញ្ញវត្ថុជាតិ និងអន្តរជាតិ ក្នុងការផ្តល់ហិរញ្ញប្បទាន ឬ អនុវត្តគម្រោងពាក់ព័ន្ធនឹងវិស័យកសិកម្ម និងសេដ្ឋកិច្ចជនបទ
អនុវត្តគម្រោងហិរញ្ញប្បទាន ឬគ្រប់គ្រងមូលនិធិផ្សេងទៀត ក្នុងក្របខណ្ឌនៃកិច្ចសហការជាមួយដៃគូអភិវឌ្ឍន៍ និងវិស័យឯកជន
គ្រប់គ្រងកម្មវិធី ឬ គម្រោងអន្តរាគមន៍របស់រាជរដ្ឋាភិបាល
កៀរគរទុន និងហិរញ្ញប្បទាន សម្រាប់ពង្រីកសកម្មភាពរបស់ ធ.អ.ជ.ក.
ផ្តល់សេវាធនាគារផ្សេងទៀត ពាក់ព័ន្ធនឹងការគ្រប់គ្រង និងចាត់ចែងធនធានហិរញ្ញវត្ថុប្រកបដោយប្រសិទ្ធភាពជូនអតិថិជនគោលដៅ ព្រមទាំងប្រកាន់ខា្ជប់នូវគោលការណ៍អភិបាលកិច្ចល្អ និងការទទួលខុសត្រូវសង្គមនិងបរិស្ថាន និង
សហការជាមួយក្រសួង-ស្ថាប័នពាក់ព័ន្ធនានា ក្នុងការបំពេញតួនាទី និងភារកិច្ចរបស់ ធ.អ.ជ.ក. ឱ្យមានប្រសិទ្ធភាព។

ចក្ខុវិស័យ

ធនាគារអភិវឌ្ឍន៏ជនបទ និងកសិកម្ម គឺជាស្ថាប័នហិរញ្ញវត្ថុឈានមុខ ដែលផ្ដោតលើការអភិវឌ្ឍ វិស័យកសិកម្ម និងជនបទ នៅប្រទេសកម្ពុជា។

បេសកកម្ម

ការអភិវឌ្ឍការផ្សារភ្ជាប់យ៉ាងរឹងមាំនៅគ្រប់បណ្តោយខ្សែច្រវាក់តម្លៃកសិកម្ម និងវិស័យជនបទ តាមរយៈបរិយាប័ន្នសេវាកម្មហិរញ្ញវត្ថុ

ការកំណត់, ការសម្របសម្រួល, និងការដោះស្រាយចន្លោះទីផ្សារនៅក្នុងវិស័យកសិកម្ម និងជនបទតាមរយៈភាពជាដៃគូយុទ្ធសាស្រ្ត

ការជំរុញពិពិធកម្មសេដ្ឋកិច្ចជនបទ តាមរយៈការផ្តល់សេវាហិរញ្ញវត្ថុដល់សហគ្រាសធុនតូចនិងមធ្យមនៅក្នុងវិស័យជនបទ និង

ការលើកកម្ពស់ការសន្សំប្រាក់នៅតាមទីជនបទ

គុណតម្លៃ

សុចរិតភាព៖ យើងប្រាថ្នាឱ្យមាននូវបទដ្ឋានខ្ពស់បំផុតនៃភាពស្មោះត្រង់ និងអាកប្បកិរិយាបុគ្គល។ យើងមិនបណ្ដោយឱ្យកេរ្ដិ៍ឈ្មោះរបស់យើងអាប់ឱនឡើយ ហើយជានិច្ចកាលយើងធ្វើសកម្មភាព ដើម្បីឧត្ដមប្រយោជន៍កសិករ និងការអភិវឌ្ឍសេដ្ឋកិច្ចសង្គម។

កិច្ចសហការ៖ យើងគោរព និងផ្ដល់តម្លៃឱ្យគ្នាទៅវិញទៅមក ប្រើប្រាស់នូវជំនាញ និងបទពិសោធន៍ផ្សេងៗគ្នា និងធ្វើការជាមួយដៃគូ ដើម្បីប្រមូលផ្ដុំកម្លាំងសកលរបស់យើង សំដៅធ្វើឱ្យមានការប្រែប្រួលជាវិជ្ជមានសម្រាប់អាជីវកម្ម និងប្រទេសជាតិ។

នវានុវត្ដន៍៖ យើងរក្សានូវការពុះពារ ដើម្បីកំណត់នូវភាពឥតខ្ចោះនូវរាល់កិច្ចការ។ ដូចនេះ យើងបើកចំហចំពោះគំនិតថ្មីៗ ដែលអាចមាននូវភាពស្ដង់ដារ និងនាំមកនូវការច្នៃប្រឌិតនានា សម្រាប់និរន្ដរភាព និងភាពរីកចម្រើននៃអាជីវកម្ម និងប្រទេសជាតិ។