[ខេត្តពោធិ៍សាត់]៖ ល្ងាច ថ្ងៃចន្ទ ៧កើត ខែផល្គុន ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៣ ខែកុម្ភៈ ឆ្នាំ២០២៦, ឯកឧត្ដមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយក ធនាគារអភិវឌ្ឍន៍ជនបទ និងកសិកម្ម (ARDB) បានអញ្ជើញចុះពិនិត្យផ្ទាល់នូវខ្សែចង្វាក់ផលិតកម្មស្រូវ-អង្ករ របស់រោងម៉ាស៊ីនកិនស្រូវចំនួន ២ កន្លែង គឺរោងម៉ាស៊ីនកិនស្រូវ ភួ គុកកី និងរោងម៉ាស៊ីនកិនស្រូវ តុង ហុង ដែលមានទីតាំងស្ថិតនៅឃុំត្រពាំងជង ស្រុកបាកាន ខេត្តពោធិ៍សាត់។
ក្នុងដំណើរទស្សនកិច្ចនេះ ឯកឧត្ដមបណ្ឌិត បានពិនិត្យយ៉ាងហ្មត់ចត់លើគ្រប់ដំណាក់កាលនៃផលិតកម្ម រាប់ចាប់តាំងពី៖
– សកម្មភាពការប្រមូលទិញស្រូវពីប្រជាកសិករ
– បច្ចេកទេសនៃការសម្ងួត និងការស្តុកទុកក្នុងឃ្លាំង
– ដំណើរការកិនកែច្នៃ ការវេចខ្ចប់តាមស្តង់ដារ និងការត្រៀមនាំចេញ
សូមបញ្ជាក់ផងដែរថា, រោងម៉ាស៊ីនទាំងពីរខាងលើ គឺជាអតិថិជនរបស់ធនាគារ ARDB ដែលទទួលបានហិរញ្ញប្បទានតាមរយៈធនាគារ ARDB ដើម្បីពង្រីកសមត្ថភាពផលិតកម្ម និងរក្សាស្ថិរភាពតម្លៃស្រូវជូនកសិករ។
តាមរយៈសកម្មភាពចុះផ្ទាល់នេះ បានបង្ហាញឱ្យឃើញកាន់តែច្បាស់ពីតួនាទីដ៏សំខាន់របស់ធនាគារ ARDB រួមមាន៖
1- ជាប្រតិបត្តិករផ្តល់ឥណទានដែលមានការប្រាក់ទាប ដើម្បីជួយដល់ម្ចាស់រោងម៉ាស៊ីនកិនស្រូវឱ្យមានទុនបង្វិល និងទុនវិនិយោគ គ្រប់គ្រាន់សម្រាប់ប្រមូលទិញស្រូវពីកសិករក្នុងរដូវប្រមូលផល។
2- ការបញ្ចេញហិរញ្ញប្បទានទាន់ពេលវេលា របស់ ARDB បានជួយទប់ស្កាត់ការបង្កាប់តម្លៃពីឈ្មួញកណ្តាល និងធានាថា កសិករទទួលបានតម្លៃសមរម្យសម្រាប់ទិន្នផលរបស់ពួកគេ។
3- តាមរយៈការគាំទ្រផ្នែកហិរញ្ញវត្ថុ លើបច្ចេកវិទ្យាសម្ងួតស្រូវ និងកិនកែច្នៃ ARDB បាននិងកំពុងជួយបង្កើនគុណភាពអង្ករកម្ពុជាឱ្យកាន់តែមានភាពប្រកួតប្រជែងលើទីផ្សារអន្តរជាតិ។
សូមបញ្ជាក់ផងដែរថា ក្នុងឆ្នាំ២០២៥ កម្ពុជាបានសម្រេចបានការនាំចេញអង្ករចំនួន ៩៤ម៉ឺនតោន ទៅទីផ្សារបរទេស, ជាមួយគ្នានេះសម្រាប់ឆ្នាំ២០២៦នេះ ឯកឧត្ដមបណ្ឌិត កៅ ថាច ក៏បានវាយតម្លៃខ្ពស់ចំពោះម្ចាស់រោងម៉ាស៊ីនដែលបានប្រើប្រាស់ហិរញ្ញប្បទានចំគោលដៅ និងបន្តបានជំរុញឱ្យបន្តពង្រឹងគុណភាពផលិតកម្ម ដើម្បីចូលរួមចំណែកសម្រេចឱ្យបាននូវគោលនយោបាយនាំចេញអង្ករ ១ លានតោនរបស់រាជរដ្ឋាភិបាលកម្ពុជា អោយសម្រេចបានដល់គោលដៅ។
