ព័ត៌មានថ្មីៗ

ទីស្នាក់ការកណ្តាលរបស់ធនាគារអភិវឌ្ឍន៍ជនបទ និងកសិកម្ម (ARDB)៖ នាព្រឹកថ្ងៃ សុក្រ ៣រោច ខែជេស្ឋ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងទី១៣ ខែមិថុនា ឆ្នាំ២០២៥, ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) រួមទាំងសហការី បានអនុញ្ញាតឱ្យគណៈប្រតិភូ និងក្រុមហ៊ុនជប៉ុន ចូលជួបសម្ដែងការគួរសម និងពិភាក្សាលើ កិច្ចសហប្រតិបត្តិការរវាងធនាគារ ARDB និងក្រុមហ៊ុនជប៉ុន ដែលបំណងចង់វិនិយោគលើវិស័យកសិកម្ម ដើម្បីជំរុញការវិនិយោគលើវិស័យកសិកម្ម និងការអភិវឌ្ឍសេដ្ឋកិច្ចជនបទ នៅកម្ពុជា។

ភ្នំពេញ៖ នាព្រឹកថ្ងៃព្រហស្បត្តិ៍ ទី១២ ខែមិថុនា ឆ្នាំ២០២៥, ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម បានដឹកនាំកិច្ចប្រជុំជាមួយក្រុមការងារស្រាវជ្រាវនៃមជ្ឈមណ្ឌល អគ្គបណ្ឌិតសភាចារ្យ អូន ព័ន្ធមុនីរ័ត្ន សម្រាប់​ការសិក្សា​គោល​នយោបាយ និងបណ្តុះបណ្តាលនៃធនាគារ ARDB (មជ្ឈមណ្ឌល APM) និងមជ្ឈមណ្ឌលឧត្តមភាពសម្រាប់ការសិក្សាស្រាវជ្រាវពីហិរញ្ញប្បទានបៃតងចំពោះវិស័យកសិកម្មរបស់សមាគមឥណទានកសិកម្ម និងជនបទ អាស៊ី-ប៉ាស៊ីហ្វិក (មជ្ឈមណ្ឌលឧត្តមភាព ARDB ACE-GFA)។ កិច្ចប្រជុំនេះត្រូវបានរៀបចំឡើង នៅស្នាក់ការកណ្តាលរបស់ធនាគារអភិវឌ្ឍន៍ជនបទ និងកសិកម្ម ក្នុងគោលបំណងពិនិត្យ និងពិភាក្សាអំពីវឌ្ឍនភាព និងលើកទិសដៅការងារបន្ទាប់របស់ក្រុមការងារស្រាវជ្រាវទាំងពីរ។ ទន្ទឹមនេះ, អង្គប្រជុំបានពិភាក្សាពីការចាត់តាំងសមាជិកតំណាងពីធនាគារ ARDB ចូលទៅក្នុងក្រុមការងារស្រាវជ្រាវ Special Interest Groups (SIGs) នៃសមាគមគ្រឹះស្ថានហិរញ្ញវត្ថុអភិវឌ្ឍន៍ក្នុងតំបន់អាស៊ី និងប៉ាស៊ីហ្វិក (ADFIAP), ដែលត្រូវបានផ្ដួចផ្ដើមឡើងក្នុងគោលបំណងដោះស្រាយបញ្ហាប្រឈមក្នុងវិស័យសំខាន់ៗនៅទូទាំងតំបន់អាស៊ី និងប៉ាស៊ីហ្វិក សំដៅរួមចំណែកក្នុងការអភិវឌ្ឍសេដ្ឋកិច្ចប្រកបដោយចីរភាពនៅក្នុងតំបន់។ ឆ្លៀតក្នុងឱកាសនេះ, ឯកឧត្ដមបណ្ឌិតប្រតិភូ បានលើកទឹកចិត្តក្រុមការងារទាំងពីរបង្កើតឱ្យមានទម្លាប់សរសេរ ស្រាវជ្រាវ និងបោះផ្សាយ ដែលនឹងរួមចំណែកក្នុងការសម្រេចគោលដៅរបស់ធនាគារ ក៏ដូចជាលើកកម្ពស់ចំណេះដឹង និងពង្រឹងសមត្ថភាពរបស់បុគ្គលិកផងដែរ។

នៅទីស្នាក់ការកណ្តាលរបស់ធនាគារអភិវឌ្ឍន៍ជនបទ និងកសិកម្ម (ARDB)៖ នារសៀលថ្ងៃ ពុធទី១១ ខែមិថុនា ឆ្នាំ២០២៥, ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម បានដឹកនាំកិច្ចប្រជុំថ្នាក់ដឹកនាំប្រចាំខែ ដើម្បីពិនិត្យ និងពិភាក្សាអំពី៖ វឌ្ឍនភាពការងារសំខាន់ៗប្រចាំខែរបស់ធនាគារ ARDB ដែលអនុវត្តស្របតាមផែនការសកម្មភាពប្រចាំឆ្នាំរបស់ធនាគារ ARDB រួមទាំងទិសដៅការងារ និងរបៀបវារៈផ្សេងៗទៀត។

ភ្នំពេញ៖ នាព្រឹកថ្ងៃសុក្រ ទី០៦ ខែមិថុនា ឆ្នាំ២០២៥, ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB), ឯកឧត្តម​ បាន លឹម​ អគ្គនាយករង បានចូលរួមជាអធិបតីក្នុងពិធីបើកវគ្គបណ្តុះបណ្តាលស្តីពី “ការរៀបចំគម្រោងស្រាវជ្រាវ និងវិធីសាស្ត្រក្នុងការស្រាវជ្រាវបែបចម្រុះ” ដែលដឹកនាំបង្រៀនដោយ លោក អាន អាយយូរណាន់ ជាបេក្ខភាពបណ្ឌិតផ្នែកវិទ្យាសាស្ត្រនយោបាយនៃសាកលវិទ្យាល័យ Toronto នៅប្រទេសកាណាដា។ វគ្គបណ្តុះបណ្តាលនេះត្រូវបានផ្តួចផ្តើមឡើងក្នុងគោលបំណងពង្រឹងសមត្ថភាពរបស់បុគ្គលិក ARDB ជាពិសេសសមាជិកក្រុមការងារស្រាវជ្រាវនៃមជ្ឈមណ្ឌល APM និងមជ្ឈមណ្ឌលឧត្តមភាព ARDB ACE-GFA ក្នុងការរៀបចំគម្រោង និងរបាយការណ៍ស្រាវជ្រាវដោយប្រើប្រាស់វិធីសាស្ដ្របែបចម្រុះ (Mixed-Methods Methodology) សំដៅបង្កើនប្រសិទ្ធភាព និងប្រសិទ្ធផលនៃការសិក្សាស្រាវជ្រាវដែលមជ្ឈមណ្ឌលទាំងពីរបាននិងកំពុងរៀបចំ។ ឯកឧត្តម បាន លឹម បានគូសបញ្ជាក់ថា​ ជំនាញស្រាវជ្រាវមិនត្រឹមតែមានសារៈសំខាន់សម្រាប់ស្ថាប័នក្នុងការរួមចំណែកសម្រេចបានគោលដៅនោះទេ តែក៏ជាជំនាញមួយដែលអាចចូលរួមពង្រឹងសមត្ថភាពរបស់បុគ្គលិកក្នុងការត្រិះរិះពិចារណា ការដោះស្រាយបញ្ហា និងការបំពេញភារកិច្ចចំពោះមុខ និងនាពេលអនាគតផងដែរ។

ភ្នំពេញ៖ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB), ឯកឧត្តម បាន លឹម អគ្គនាយករង អមដោយប្រតិភូធនាគារ ARDB បានអញ្ជើញចូលរួមក្នុងវេទិកាគោលនយោបាយថ្នាក់តំបន់របស់សមាគមឥណទានកសិកម្ម និងជនបទ អាស៊ី-ប៉ាស៊ីហ្វិក (APRACA Regional Policy Forum), កិច្ចប្រជុំគណៈកម្មការប្រតិបត្តិនៃសមាគម APRACA លើកទី៧៨ (78th APRACA Executive Committee Meeting), និងកិច្ចប្រជុំមជ្ឈមណ្ឌលឧត្តមភាពនៃសមាគម APRACA (Meeting of APRACA Centers of Excellence—ACE) ដែលប្រព្រឹត្តទៅចាប់ពីថ្ងៃទី២៦ ដល់ថ្ងៃទី២៨ ខែឧសភា ឆ្នាំ២០២៥ កន្លងទៅនេះនៅកោះបាលីនៃប្រទេសឥណ្ឌូនេស៊ី។ ការចូលរួមក្នុងព្រឹត្តិការណ៍ថ្នាក់តំបន់ទាំងនេះបាននាំមកនូវសមិទ្ធផលសំខាន់ៗជាច្រើន និងបានឆ្លុះបញ្ចាំងសារជាថ្មីពីឆន្ទៈដ៏មោះមុតរបស់ធនាគារ ARDB ក្នុងការលើកកម្ពស់ការអភិវឌ្ឍវិស័យកសិកម្ម និងសេដ្ឋកិច្ចជនបទ ព្រមទាំងចូលរួមក្នុងកិច្ចខិតខំប្រឹងប្រែងរបស់ធនាគារក្នុងការពង្រឹងកិច្ចសហប្រតិបត្តិការក្នុងតំបន់ និងជំរុញដល់ការធ្វើនវានុវត្តក្នុងវិស័យហិរញ្ញវត្ថុ និងវិស័យកសិកម្ម ដែលគាំទ្រការអភិវឌ្ឍប្រកបដោយចីរភាព និងបរិយាបន្នទាំងនៅប្រទេសកម្ពុជា និងក្នុងតំបន់អាស៊ី-ប៉ាស៊ីហ្វិក។

ជំនួបពិភាក្សាការងារលើកដំបូង បន្ទាប់ពីការចុះអនុស្សារណៈយោគយល់លើកិច្ចសហប្រតិបត្តិការរវាង ធនាគារអភិវឌ្ឍន៍កសិកម្មនិងជនបទ (ARDB), ក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ (CARD), និងគណកម្មាធិការជាតិជំរុញចលនាភូមិមួយផលិតផលមួយ (OVOP)។ —————————————————————————————————– នារសៀលថ្ងៃទី៣០ ខែមេសា ឆ្នាំ២០២៥ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារARDB, ឯកឧត្តម បាន លឹម អគ្គនាយករងនៃធនាគារ ARDB អមដោយសហការីបានចូលរួមប្រជុំពិភាក្សាការងារលើកដំបូង ជាមួយក្រុមការងារ CARD និង OVOP ដឹកនាំដោយឯកឧត្តម អ៊ុក ម៉ាការា អនុប្រធាន CARD។ កិច្ចពិភាក្សានេះ មានគោលដៅជំរុញការអនុវត្តអនុស្សរណៈយោគយល់គ្នារវាងភាគីទាំងបីអោយមានប្រសិទ្ធភាពខ្ពស់, ពិភាក្សាលើផែនការសកម្មភាពអនុវត្តអនុស្សរណៈប្រចាំឆ្នាំ២០២៥, បង្កើនកិច្ចសហប្រតិបត្តិការភាពជាដៃគូក្នុងការអភិវឌ្ឍវិស័យកសិកម្ម និងជនបទ, និងជំរុញចលនាភូមិមួយផលិតផលមួយនៅកម្ពុជា ដើម្បីគាំទ្រដល់ការអនុវត្តគោលនយោបាយរបស់រាជរដ្ឋាភិបាល។

ខេត្ត​​អៃជី​,​ ប្រទេស​ជប៉ុន​៖​ នា​រសៀល​​ថ្ងៃ​​ព្រហស្បតិ៍ ៣កើត ខែជេស្ឋ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៩ ខែឧសភា ឆ្នាំ២០២៥​ នេះ ឯកឧត្តម​បណ្ឌិត​ កៅ​ ថាច​ ប្រតិភូ​រាជរដ្ឋាភិបាល​ ទទួល​បន្ទុក​ជា​អគ្គនាយក​ ធនាគារ​អភិវឌ្ឍន៍​ជនបទ​ និង​កសិកម្ម​ (ARDB) ព្រម​ជាមួយ​លោក​ រស់​ រាសី​ ប្រធាន​សមាគមខ្មែរ​នៅ​ប្រទេស​ជប៉ុន​ បាន​ដឹកនាំ​គណៈ​ប្រតិភូ​ ARDB និង​វិនិយោគិន​ខ្មែរ​ ចូល​ជួប​សម្ដែង​ការ​គួរសម​និង​ពិភាក្សា​ការងារ​ជាមួយ​ ឯកឧត្តម​ Hideaki Omura អភិបាល​ខេត្ត​អៃជី។ ក្នុង​កិច្ចការ​ពិភាក្សា​នេះ​ ឯកឧត្តម​អភិបាល​ បាន​សម្ដែង​នូវ​ការ​ស្វាគមន៍​យ៉ាង​កក់ក្ដៅ​បំផុត​ជូន​ ចំពោះ​គណៈប្រតិភូ​កម្ពុជា​ ដែល​អញ្ជើញ​មក​ទស្សនកិច្ច​នៅ​ប្រទេស​ជប៉ុន​ ជាពិសេស​ខេត្ត​អៃជី​។ ក្នុង​ឱកាស​នេះ​ឯកឧត្តម​បណ្ឌិត​ប្រតិភូ​ បាន​ថ្លែង​អំណរគុណ​យ៉ាង​ជ្រាលជ្រៅ​ចំពោះ​ការ​ស្វាគមន៍​ និង​បាន​ស្នេីសុំ​ឯកឧត្តម​អភិបាល​ បន្ត​ពង្រឹង​ និង​ពង្រីក​កិច្ច​សហការ​ប្រតិបត្តិ​ការ​ល្អ​បន្ថែម​ទៀត​។

គណៈប្រតិភូធនាគារ ARDB អញ្ជើញចូលរួមកិច្ចប្រជុំមជ្ឈមណ្ឌលឧត្តមភាពនៃសមាគម APRACA លើកទី១ កោះបាលី-ប្រទេសឥណ្ឌូនេស៊ី៖ នាព្រឹកថ្ងៃពុធ ទី២៨ ខែឧសភា ឆ្នាំ២០២៥ គណៈប្រតិភូធនាគារអភិវឌ្ឍន៍ជនបទ និងកសិកម្ម (ARDB) បានអញ្ជើញចូលរួមកិច្ចប្រជុំមជ្ឈមណ្ឌលឧត្តមភាពនៃសមាគមឥណទានកសិកម្ម និងជនបទ អាស៊ី-ប៉ាស៊ីហ្វិក (Meeting of APRACA Centers of Excellence) លើកទី១ នៅកោះបាលីនៃប្រទេសឥណ្ឌូនេស៊ី ដើម្បីត្រួតពិនិត្យវឌ្ឍនភាពការងារ ក៏ដូចជាជំរុញកិច្ចសហប្រតិបត្តិការ និងផ្លាស់ប្តូរបទពិសោធរវាងមជ្ឈមណ្ឌលឧត្តមភាពទាំងអស់នៃសមាគម APRACA ផងដែរ។ ក្នុងអំឡុងកិច្ចប្រជុំនេះ គណៈប្រតិភូធនាគារ ARDB បានធ្វើបទបង្ហាញពីវឌ្ឍនភាពការងារ និងផែនការសកម្មភាព ឆ្នាំ២០២៥-២០២៦ របស់មជ្ឈមណ្ឌលឧត្តមភាពសម្រាប់ការសិក្សាស្រាវជ្រាវពីហិរញ្ញប្បទានបៃតងចំពោះវិស័យកសិកម្មរបស់សមាគម APRACA (ARDB ACE-GFA) ដែលទើបតែបានដាក់ឱ្យដំណើរការជាផ្លូវការ កាលពីថ្ងៃទី១៨ ខែមេសា ឆ្នាំ២០២៥នេះ ព្រមទាំងបានគូសរំលេចពីការប្តេជ្ញារបស់ធនាគារ ARDB ក្នុងការបន្តគាំទ្រកិច្ចខិតខំប្រឹងប្រែងនានារបស់មជ្ឈមណ្ឌលឧត្តមភាព ជាពិសេសការជំរុញការផ្តល់ហិរញ្ញប្បទានបៃតង និងហិរញ្ញប្បទានប្រកបដោយចីរភាពក្នុងវិស័យកសិកម្ម។

ជំនួបពិភាក្សាលើការអនុវត្តអនុស្សារណៈយោគយល់រវាងគណ:ប្រតិភូធនាគារ ARDB និងធនាគារ ADBC ប្រទេសឥណ្ឌូនេស៊ី៖ ឆ្លៀតក្នុងឱកាសចូលរួមវេទិកាគោលនយោបាយថ្នាក់តំបន់របស់សមាគមឥណទានកសិកម្ម និងជនបទ អាស៊ី-ប៉ាស៊ីហ្វិក (APRACA), ធនាគារអភិវឌ្ឍន៍ជនបទ និងកសិកម្ម (ARDB) បានជួបពិភាក្សាជាមួយលោក Qian Wenhui ប្រធានសមាគម APRACA និងគណៈប្រតិភូធនាគារអភិវឌ្ឍន៍កសិកម្មនៃប្រទេសចិន (Agricultural Development Bank of China—ADBC) ក្នុងអំឡុងកិច្ចប្រជុំគណៈកម្មការប្រតិបត្តិនៃសមាគម APRACA លើកទី៧៨ (78th Executive Committee Meeting of APRACA) កាលពីរសៀលថ្ងៃចន្ទ ទី២៦ ខែឧសភា ឆ្នាំ២០២៥ នៅកោះបាលីនៃប្រទេសឥណ្ឌូនេស៊ី។ ជំនួបពិភាក្សានេះបានប្រព្រឹត្តទៅក្នុងគោលដៅពិភាក្សាបន្ថែមពីការពង្រីកនិងពង្រឹងកិច្ចសហប្រតិបត្តិការក្នុងការអនុវត្តអនុស្សារណៈនៃការយោគយល់គ្នារវាងធនាគារទាំងពីរ។

គណៈប្រតិភូធនាគារ ARDB អញ្ជើញចូលរួមកិច្ចប្រជុំគណៈកម្មការប្រតិបត្តិនៃសមាគម APRACA កោះបាលី-ប្រទេសឥណ្ឌូនេស៊ី៖ នារសៀលថ្ងៃចន្ទ ទី២៦ ខែឧសភា ឆ្នាំ២០២៥, ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB), ឯកឧត្តម បាន​ លឹម អគ្គនាយករង និងសហការី បានអញ្ជើញចូលរួមក្នុងកិច្ចប្រជុំគណៈកម្មការប្រតិបត្តិនៃសមាគមឥណទានកសិកម្ម និងជនបទ អាស៊ី-ប៉ាស៊ីហ្វិក លើកទី៧៨ (78th Executive Committee Meeting of APRACA) ដើម្បីពិនិត្យមើលវឌ្ឍនភាពការងារ រួមមាន កិច្ចខិតខំប្រឹងប្រែងរបស់សមាគមក្នុងការពង្រឹងកិច្ចសហប្រតិបត្តិការជាមួយអង្គការអន្តរជាតិ និងពិនិត្យមើលសមិទ្ធិផលការងារសំខាន់ៗរបស់មជ្ឈមណ្ឌលឧត្តមភាពជាដើម។ កិច្ចប្រជុំដ៏សំខាន់នេះ គឺជាវេទិកាសម្រាប់សមាជិកគណៈកម្មការប្រតិបត្តិ ក្នុងការពិភាក្សាពីផែនការយុទ្ធសាស្រ្តរបស់សមាគម APRACA សម្រាប់ឆ្នាំ២០២៥-២០៣០ និងផែនការសកម្មភាពសំខាន់ៗដទៃទៀត ដែលផ្តោតសំខាន់លើការលើកកម្ពស់ការផ្តល់ហិរញ្ញប្បទានបៃតង បរិយាប័ន្នឌីជីថល និងការគាំទ្រដល់សហគ្រាសធុនតូច និងមធ្យមក្នុងវិស័យកសិកម្ម។